Яңылыҡтар

19.03.20 11:38

19 мартта Өфөлә Башҡортостан Башлығы Радий Хәбиров «Аврора» үҙәгендә булды.

19 мартта Өфөлә Башҡортостан Башлығы Радий Хәбиров «Аврора» үҙәгендә булды. Уның эшмәкәрлеге республикалағы һәләтле балаларҙы үҫтереүгә йүнәлтелгән. Төбәк етәксеһе фәнни лабораториялар, спорт майҙансыҡтарын һәм ижади оҫтаханаларҙы ҡараны.

Үҙәк директоры вазифаһын башҡарыусы Айҙар Сәйғәфәров әйтеүенсә, профилле сменаларға фәндә, спортта, ижадта уңыш ҡаҙанған 10 йәштән 17 йәшкә тиклемге балалар ҡабул ителә. Бында йылына йәмғеһе 600 кеше шөғөлләнә ала. Оҫталыҡ дәрестәрен һәм лекцияларҙы юғары уҡыу йорттары уҡытыусылары, билдәле тренерҙар һәм сәнғәт әһелдәре алып бара. Үҙәкте йыһазландырыу өсөн республика һәм федераль бюджеттан, шулай уҡ Социаль маҡсатлы программалар фондынан 198 млн һум аҡса бүленгән.

Үҫмерҙәргә белем биреүсе педагогик колектив Радий Хәбировҡа үҙәктең майҙанын арттырыу мөмкинлеген ҡарау тураһында үтенде. Республика етәксеһе был һорауҙы өйрәнергә һәм оптималь тәҡдимдәр индерергә ҡушты.