Яңылыҡтар

23.02.20 9:51

Башҡортостан “Иван Грен” карабы менән шефлыҡ бәйләнештәре тураһындағы килешеүгә ҡул ҡуйҙы

23 февралдә Республика йортонда Башҡортостан Хөкүмәте һәм Төньяҡ флоттың “Иван Грен” ҙур десант карабы командованиеһы шефлыҡ бәйләнештәре тураһындағы килешеүгә ҡул ҡуйҙы. Килешеүгә Башҡортостан Башлығы Радий Хәбиров менән карап командиры, 2 ранг капитаны Андрей Жарков ҡул ҡуйҙы.

Документҡа ярашлы Башҡортостан Хөкүмәте карапҡа контракт буйынса хеҙмәт итер өсөн лайыҡлы кандидаттар һайлап алып ебәреүгә булышлыҡ итәсәк, Башҡортостандың ижади коллективтары сығыштарын ойошторасаҡ, экипаж тормошондағы көнкүреш, һауыҡтырыу һәм башҡа мәсьәләләрҙе хәл итеүҙә ҡатнашасаҡ, экипаж ҡатнашлығында предприятие һәм уҡыу йорттарында хәрби-патриотик эштәр үткәреүҙе тәьмин итәсәк.

- Бөгөн беҙҙең илебеҙ тарихындағы мөһим даталарҙың береһе – Армия һәм Хәрби-диңгеҙ флоты көнө, - тине Радий Хәбиров. – Тап ошо көндө “Иван Грен” десант карабы командованиеһы менән килешеүгә ҡул ҡуйыуыбыҙ бик әһәмиәтле. Беҙҙең өсөн был ҙур мәртәбә. Республикабыҙҙың иң әҙерлекле һалдаттары һеҙгә хеҙмәт итергә барыр тип ышанабыҙ. Хәрби карап өҫтөндә Башҡортостан флагының да елберләп тороуы бик ҡыуаныслы.